लोक आवाज,
जनकपुरधाम, १६ भदौ । माथिल्लो त्रिशूली–३ ए जलविद्युत् आयोजनाको सुरुङमा फसेका व्यक्तिहरूको खोज तथा उद्धारका लागि नेपाल आएको कोरियन प्राविधिक टोली आवश्यक उपकरणको अभावमा उद्धार कार्य सुरु नगरी फर्किएको छ ।
आयोजनाको प्रभावित क्षेत्रमा पुगेको कोरियन प्राविधिक टोलीले सुरुङभित्र प्रवेश गरी उद्धार कार्य अघि बढाउन **मिनी स्काभेटर र मड पम्प** आवश्यक रहेको जनाएको थियो । तर, ती उपकरण तत्काल उपलब्ध हुन नसकेपछि टोली उद्धारमा संलग्न नभई धुन्चे फर्किएको हो ।
बाढीपहिरोका कारण आयोजनाको सुरुङ तथा आसपासका क्षेत्रमा ठूलो क्षति पुगेपछि सुरुङभित्र फसेकाहरूको खोजी तथा उद्धार थप चुनौतीपूर्ण बनेको छ । पानी, हिलो तथा भग्नावशेषका कारण सुरुङभित्र प्रवेश गर्न कठिनाइ भइरहेको बताइएको छ ।
सुरुङभित्र जमेको पानी र हिलो हटाउन मड पम्प तथा भग्नावशेष पन्छाउन मिनी स्काभेटर आवश्यक पर्ने प्राविधिक टोलीको भनाइ छ । आवश्यक उपकरण उपलब्ध नहुँदा उद्धारका लागि आएको विदेशी प्राविधिक टोलीसमेत तत्काल काम सुरु गर्न नसकी फर्किनुपरेको हो ।
उद्धार कार्यलाई प्रभावकारी बनाउन आवश्यक उपकरण तत्काल व्यवस्थापन गरी सुरुङभित्र फसेकाहरूको अवस्था पहिचान तथा खोजी कार्यलाई तीव्रता दिनुपर्ने देखिएको छ ।
प्रतिक्रिया !