लोक आवाज ,

जनकपुरधाम, २६ जेठ । राष्ट्रिय स्वतन्त्र पार्टी (रास्वपा) ले धनुषा जिल्ला कार्यसमितिका सभापति लक्ष्मेश्वर यादवलाई पदबाट निलम्बन गरेको छ।

पार्टीको केन्द्रीय अनुशासन आयोगले मंगलबार जारी गरेको पत्रमार्फत थप अनुसन्धान प्रक्रिया नसकिँदासम्म यादवलाई जिल्ला सभापतिको जिम्मेवारीबाट अलग गरिएको जनाएको हो।

आयोगका कार्यवाहक प्रमुख रमाकान्त रिमालद्वारा हस्ताक्षरित पत्रअनुसार यादवविरुद्ध पार्टीको विधान, आचारसंहिता तथा मूल्यमान्यता विपरीत गतिविधि गरेको, पदीय जिम्मेवारी प्रभावकारी रूपमा निर्वाह नगरेको, क्षेत्राधिकारभन्दा बाहिर गई हस्तक्षेप गरेको तथा समूहगत राजनीति प्रोत्साहन गरेको लगायतका विषयमा विभिन्न उजुरी परेका थिए।

उजुरीका आधारमा आयोगले यसअघि यादवसँग स्पष्टीकरण मागेको थियो। प्राप्त स्पष्टीकरणको अध्ययनपछि थप अनुसन्धान र प्रमाण संकलन आवश्यक देखिएकाले अन्तरकालीन आदेश जारी गर्दै उनलाई निलम्बन गरिएको आयोगले जनाएको छ।

आयोगले अर्को निर्णय वा सूचना जारी नहुँदासम्म यादवलाई जिल्ला सभापतिको हैसियतमा कुनै पनि काम गर्न, पार्टीका बैठक तथा गतिविधिमा सहभागी हुन तथा संगठनात्मक जिम्मेवारी निर्वाह गर्न रोक लगाएको छ।

यस निर्णयबारे पार्टीको केन्द्रीय कार्यसमिति, केन्द्रीय संगठन विभाग, मधेश प्रदेश कार्यसमिति, प्रदेश अनुशासन आयोग तथा जिल्ला अनुशासन आयोग धनुषालाई समेत जानकारी गराइएको जनाइएको छ।