लोक आवाज ,

काठमाडौं , २९ चैत । प्रधानमन्त्री बालेन्द्र शाहको पहिलो औपचारिक वैदेशिक भ्रमणका रूपमा हुने भारत भ्रमणको तयारी सरकारले तीव्र पारेको छ। भारतीय प्रधानमन्त्री Narendra Modi ले प्रधानमन्त्रीमा निर्वाचित भएपछि पठाएको बधाई सन्देशमार्फत दिएको निमन्त्रणालाई स्वीकार गर्दै शाहले उपयुक्त समयमा भारत भ्रमण गर्ने बताएका थिए।

सोही अनुसार परराष्ट्र मन्त्रालयले भ्रमणको तयारीलाई अगाडि बढाएको हो। परराष्ट्रमन्त्री Shishir Khanal का अनुसार, यस भ्रमणलाई औपचारिकतामा सीमित नराखी ठोस उपलब्धिमूलक बनाउने सरकारको लक्ष्य छ।

भ्रमणका मुख्य एजेन्डामा नेपालको जलविद्युतलाई भारतीय बजारमा सहज पहुँच दिलाउने, तथा बंगलादेशसँगको त्रिदेशीय विद्युत व्यापारको स्पष्ट ढाँचा तयार पार्ने विषय प्राथमिकतामा छन्। यससँगै भैरहवा र पोखरा अन्तर्राष्ट्रिय विमानस्थलका लागि नयाँ हवाई प्रवेश मार्गबारे भारतसँग निर्णायक वार्ता गर्ने तयारी गरिएको छ।

त्यसैगरी सन् १९५० को सन्धि र ईपीजी प्रतिवेदनबारे नेपालको स्पष्ट धारणा प्रस्तुत गर्दै दुई देशबीचको कूटनीतिक सम्बन्धलाई नयाँ ढङ्गले अघि बढाउने प्रधानमन्त्री शाहको प्रमुख उद्देश्य रहेको बताइएको छ।

भ्रमणको मिति तय गर्नुअघि दुवै देशका सचिवस्तरीय संयन्त्रमार्फत एजेन्डामा सहमति जुटाइनेछ। परराष्ट्र मन्त्रालय स्रोतका अनुसार, आगामी महिनाभित्रै भ्रमण सम्पन्न गर्ने तयारी भइरहेको छ।

परम्परागत राजनीतिक पृष्ठभूमिभन्दा फरक छवि बनाएका शाहका लागि यो भ्रमण केवल शिष्टाचार भेटघाट मात्र नभई नेपालको राष्ट्रिय हितलाई नयाँ दृष्टिकोणबाट अघि बढाउने महत्वपूर्ण अवसरका रूपमा हेरिएको छ। साथै, विगतका कूटनीतिक चिसोपन हटाउँदै विश्वासको वातावरण निर्माण गर्नु यस भ्रमणको मुख्य चुनौती र प्राथमिकता हुनेछ।