लोक आवाज ,

एजेन्सी , ०८ चैत । अमेरिकी राष्ट्रपति डोनाल्ड ट्रम्प ले मध्यपूर्वमा जारी तनावबीच इरानसँग सकारात्मक वार्ता भइरहेको दाबी गर्दै सम्भावित सैन्य आक्रमण पाँच दिनका लागि स्थगित गर्ने घोषणा गरेका छन्।

उनले आफ्नो सामाजिक सञ्जाल Truth Social मार्फत पछिल्ला दुई दिनमा दुवै पक्षबीच ‘गहिरो, विस्तृत र फलदायी’ छलफल भएको उल्लेख गरेका छन्। यही संवादलाई निरन्तरता दिन उनले इरानका ऊर्जा केन्द्र र विद्युत् पूर्वाधारमाथि हुने सबै आक्रमण रोक्न रक्षा विभागलाई निर्देशन दिएका हुन्।

यसअघि ट्रम्पले इरानलाई Strait of Hormuz नखोले ४८ घण्टाभित्र आक्रमण गर्ने चेतावनी दिएका थिए। तर अहिले उनले उक्त अल्टिमेटमलाई लम्ब्याउँदै कूटनीतिक पहललाई प्राथमिकता दिएको देखिन्छ।

ट्रम्पको यो पछिल्लो अभिव्यक्ति हालैका दिनमा देखिएको कडा र आक्रामक भाषाशैलीभन्दा फरक, अपेक्षाकृत नरम र मेलमिलापपूर्ण मानिएको छ। यसले अन्तर्राष्ट्रिय स्तरमा सकारात्मक संकेत दिएको विश्लेषण गरिएको छ।

यद्यपि, इरानले यसबारे औपचारिक प्रतिक्रिया दिएको छैन भने वार्ताको मुख्य एजेन्डा—जस्तै ब्यालिस्टिक मिसाइल कार्यक्रम, परमाणु संवर्द्धन वा युद्धविराम—बारे पनि स्पष्ट जानकारी सार्वजनिक गरिएको छैन।

विशेषज्ञहरूका अनुसार Strait of Hormuz माथिको नियन्त्रण इरानका लागि महत्वपूर्ण रणनीतिक साधन भएकाले यसलाई खुला गर्ने विषयमा तत्काल सहमति हुने सम्भावना कम देखिन्छ।