लोक आवाज,
रौतहट मंसिर १८ । रौतहटमा जेनजी आन्दोलन उग्र बन्दै गएको समयमा सरकारी सम्पत्तिमा क्षति पुर्‍याएको आरोपमा दुई जनालाई प्रहरीले पक्राउ गरेको छ। भदौ २३ र २४ गते चलेको आन्दोलनका बीच इलाका प्रहरी कार्यालय चन्द्रपुर तथा कार्यालयमा रहेका सवारी साधनमा गरिएको तोडफोड र आगजनीमा संलग्न ठहरिएका दुई जनालाई बुधबार दिउँसो पक्राउ गरिएको हो।

पक्राउ पर्नेमा चन्द्रपुर नगरपालिका–४ का ३२ वर्षीय दीपक बस्नेत र वडा ८ का ४३ वर्षीय हरि नारायण चौधरी रहेको जिल्ला प्रहरी कार्यालय रौतहटका प्रवक्ता डीएसपी विष्णुप्रदीप बस्यालले जानकारी दिए। उनका अनुसार उनीहरूविरुद्ध आपराधिक उपद्रवसम्बन्धी मुद्दामा जिल्ला अदालतबाट म्याद थप गराई हिरासतमा राखिएको छ।