लोक आवाज ,

जनकपुरधाम , १४ कार्तिक । लगातारको वर्षाका कारण आज बिहान नारायणगढ–मुग्लिन सडकखण्डमा पहिरो खस्दा यातायात आवागमन केही समयका लागि अवरुद्ध भएको थियो । इलाका प्रहरी कार्यालय मुग्लिनका प्रमुख प्रहरी निरीक्षक प्रतीक सिंहका अनुसार इच्छाकामना गाउँपालिका–५ तुइनखोला पुल नजिकै बिहान करिब ८ः४० बजे पहिरो खसेपछि सडक पूर्णरूपमा बन्द भएको हो ।

पहिरोका कारण सवारी साधन दुवैतर्फ रोकिएका थिए र यात्रुहरू लामो समयसम्म सडक खुल्ने प्रतीक्षामा बस्नुपरेको थियो । सडक विभागको मेसिन र सुरक्षाकर्मीहरूको सहकार्यमा पहिरो पन्छाउने कार्य तीव्र रूपमा सुरु गरिएको थियो । करिब दुई घण्टा लामो प्रयासपछि बिहान १०ः२५ बजेदेखि सडक दुईतर्फी रूपमा सञ्चालनमा आएको प्रहरीले जानकारी दिएको छ ।

सडक सञ्चालनमा आए पनि निरन्तर वर्षा जारी रहेकाले उक्त क्षेत्रमा अझै पहिरो खस्ने उच्च जोखिम रहेको जनाइएको छ । प्रहरी निरीक्षक सिंहले यात्रु र चालकहरूलाई अत्यन्त सावधानीपूर्वक यात्रा गर्न अनुरोध गरेका छन् ।

नारायणगढ–मुग्लिन सडक देशका मुख्य व्यापारिक र यात्रु मार्गहरूमध्ये एक भएकाले यस खण्डमा अवरोध हुँदा काठमाडौंसहित देशका विभिन्न भागमा सामान ढुवानीमा असर पर्ने गर्दछ । त्यसैले सडक खुलिसके पनि सतर्कता अपनाउन सम्बन्धित निकायले सबैलाई आग्रह गरेको छ ।