लोक आवाज,
काठमाडौँ, भदौ ६ । नेपाली बजारमा आज सुन र चाँदी दुवैको मूल्यमा उल्लेखनीय वृद्धि भएको छ। नेपाल सुनचाँदी व्यवसायी महासंघका अनुसार छापावाल सुनको मूल्य तोलामा ४ सय रुपैयाँले बढेर १,९५,२०० रुपैयाँमा पुगेको छ। यस्तै, चाँदीको मूल्य पनि २० रुपैयाँले वृद्धि भई तोलाको २,३१० रुपैयाँमा कारोबार भइरहेको छ।

पछिल्ला दिनहरूमा अन्तर्राष्ट्रिय बजारमा आएको उतारचढाव, डलरको विनिमय दरमा देखिएको परिवर्तन, र विश्वव्यापी राजनीतिक–आर्थिक संकेतहरूले नेपाली बजारमा समेत प्रत्यक्ष असर पारेको व्यवसायीहरू बताउँछन्। मूल्यवृद्धिले उपभोक्तामात्र होइन, सुनचाँदी क्षेत्रमा संलग्न व्यवसायीहरूलाई पनि सतर्क बनाएको छ। विशेषगरी वैवाहिक सिजन नजिकिँदै गर्दा मूल्यको यो उतारचढावले बजारमा अनिश्चितता थपिएको व्यवसायीहरूको धारणा छ।

महासंघले आगामी दिनमा सुनचाँदीको मूल्य अझै चञ्चल हुन सक्ने भन्दै उपभोक्तालाई सूचित रहन सुझाव दिएको छ।