लोक आवाज,
काठमाडौँ,भदौ ६ । नेकपा एमालेका अध्यक्ष तथा प्रधानमन्त्री केपी शर्मा ओलीले शुक्रबार केन्द्रीय कार्यालय च्यासलमा आयोजित कार्यक्रममा आम जनता पार्टी आजपा का वरिष्ठ उपाध्यक्ष उपेन्द्र साह लगायत विभिन्न नेता कार्यकर्ताहरूलाई एमालेमा प्रवेश गराएर स्वागत गरेका छन्। यस अवसरमा आजपाका स्थायी कमिटी सदस्य मनोजकुमार यादव, फतुवा विजयपुरका पूर्व उपप्रमुख कान्तिदेवी महतो, माधवनारायण नगरपालिकाका पूर्व उपप्रमुख सिमलकुमारी साहसहित रौतहट तथा धनुषाका अन्य नेताहरू पनि एमालेमा प्रवेश गरेका छन्।
अध्यक्ष ओलीले स्वागत गर्दै भने, “अहिले केही समय अलमलमा रहेका साथीहरूले सही घर एमालेमा फर्किएका छन्। हामी सबैले मिलेर देश निर्माणमा लाग्नुपर्ने समय आएको छ। हामी शान्ति, मानवता र समृद्धिको लागि प्रतिबद्ध छौं र अपराध तथा गलत बाटोबाट मुक्त हुनु आवश्यक छ।” पूर्वराष्ट्रपति विद्यादेवी भण्डारीको पार्टी सदस्यता सम्बन्धमा आएको भ्रमप्रति ओलीले स्पष्टिकरण दिँदै भने कि भण्डारीले राष्ट्रपतिमा नियुक्त भएपछि स्वतः पार्टी सदस्यता त्यागेकी हुन्। “पार्टीमा नआइ सदस्यता नवीकरण नगरी सदस्यता कायम हुने अवस्था छैन,” ओलीले जोड दिए।
कार्यक्रममा उपेन्द्र साहले भने, “प्रभु साह नेतृत्वको आजपाले जनताको हितमा काम गर्न सकेन। एमाले नै हाम्रो नयाँ गन्तव्य हो र हामी यहीबाट जनसेवा गर्नेछौं।” यसरी एमालेले नयाँ नेतृत्व र जनमत जोड्दै पार्टीलाई अझ सशक्त बनाउन लागिरहेको छ।
प्रतिक्रिया !