लोक आवाज

जनकपुरधाम, भदौ ३ । मधेश प्रदेशका मुख्यमन्त्री सतिशकुमार सिंहले प्रदेश सरकार शिक्षाको गुणस्तर सुधारलाई आफ्नो प्रमुख प्राथमिकता बनाउँदै अघि बढिरहेको बताएका छन्।

मंगलबार जनकपुरधाममा शिक्षा तथा संस्कृति मन्त्रालयले आयोजना गरेको विशेष समारोहलाई सम्बोधन गर्दै मुख्यमन्त्री सिंहले दिनानुदिन खस्किँदो शैक्षिक स्तरलाई उकास्न प्रदेश सरकारले ठोस योजना तयार पारेर कार्यान्वयन गरिरहेको स्पष्ट पारे। उनले विद्यार्थी, शिक्षक, अभिभावक र सरोकारवालाबीच सहकार्य र सामूहिक प्रयासले मात्र दीर्घकालीन सुधार सम्भव हुने धारणा व्यक्त गरे।

कार्यक्रमको अवसरमा माध्यमिक शिक्षा परीक्षा (एसईई) २०८१ मा धनुषा, महोत्तरी, सर्लाही, सिरहा र सप्तरीका स्थानीय तहबाट उत्कृष्ट नतिजा हासिल गर्ने १५० जना विद्यार्थीलाई प्रोत्साहनस्वरूप साइकल वितरण गरिएको थियो। नेपाल एसबिआई बैंक लिमिटेडको संस्थागत सामाजिक उत्तरदायित्व (CSR) कार्यक्रमअन्तर्गत प्राप्त साइकलहरू वितरण गरिएको हो।

मुख्यमन्त्री सिंहले कमजोर नतिजाबीच पनि उच्च उपलब्धि आर्जन गर्ने विद्यार्थीलाई बधाई दिँदै उज्ज्वल भविष्यको शुभकामना दिए। उनले विद्यार्थीसँग सम्बोधन गर्दै भने, “राष्ट्रलाई कसरी अघि बढाउने भन्ने जिम्मेवारी भविष्यमा तपाईंहरूको काँधमा आउन सक्छ। त्यसैले देशको समृद्धि र विकासमा सक्रिय योगदान दिने भूमिका निर्वाह गर्नुपर्नेछ।”

शैक्षिक इतिहासको प्रसंग जोड्दै उनले विगतमा मधेश प्रदेशको शिक्षा स्तरले देशव्यापी छुट्टै पहिचान बनाएको स्मरण गरे। अहिले पनि त्यस पहिचानलाई पुनः कायम गर्न प्रदेश सरकारले योजनाबद्ध रूपमा काम गरिरहेको उनले बताए।

लोकसेवा आयोगसम्बन्धी विषयलाई जोड्दै मुख्यमन्त्री सिंहले २०७५ सालदेखि रोकिएका नतिजाका कारण धेरै पदहरू रिक्त रहेको जानकारी दिए। उनले हालैको नेतृत्वमा आयोगमा पदाधिकारी नियुक्त गरेर करिब ५५० जना कर्मचारीको सिफारिस भइसकेको जानकारी दिँदै प्रशासनिक क्षेत्रलाई सबल बनाइने प्रतिबद्धता व्यक्त गरे। साथै, महिला आरक्षण कोटामा पर्याप्त आवेदन नपर्ने समस्या रहेको उल्लेख गर्दै उनले महिलाहरूलाई सक्रिय रूपमा सहभागिता जनाउन आग्रह गरे।

सामुदायिक विद्यालयमा छोराछोरी पढाउने अभिभावकलाई विशेष ध्यान दिन आग्रह गर्दै उनले भने, “अभिभावकले विद्यालयमा चासो देखाएमा शैक्षिक गुणस्तरमा उल्लेखनीय सुधार सम्भव हुन्छ।”

कार्यक्रम शिक्षा तथा संस्कृतिमन्त्री रानी शर्मा तिवारीको अध्यक्षतामा सम्पन्न भएको थियो। कार्यक्रममा भारतको महाबाणिज्य दूतावास बीरगञ्जका प्रमुख देवी सहाय मिना, नीति तथा योजना आयोगका सदस्य डा. शिला मिश्रा, शिक्षा तथा संस्कृति मन्त्रालयका निमित्त सचिव दिलिप ठाकुरलगायतको उपस्थिति थियो।

मुख्यमन्त्री सिंहको भनाइअनुसार, मधेश प्रदेश सरकारले शिक्षा क्षेत्रमा गुणात्मक सुधार ल्याउन दीर्घकालीन दृष्टिकोणका साथ योजनाबद्ध कदम चाल्नेछ। यसरी सरकारी र निजी क्षेत्रको सहकार्य, विद्यार्थीहरूको मेहनत, शिक्षकहरूको जिम्मेवारी र अभिभावकहरूको चासोले मात्र प्रदेशको शिक्षा क्षेत्रमा नयाँ युगको सुरुवात गर्ने विश्वास उनले व्यक्त गरे।