काठमाडौँ, १५ असार । एएफसी महिला एसियन कप छनोट अन्तर्गत समूह ‘एफ’ को पहिलो खेलमा नेपालले लाओसलाई ९–० ले पराजित गर्दै प्रतियोगितामा ऐतिहासिक जित हात पारेको छ। यो जितसँगै नेपालको महिला फुटबल टोलीले बलियो सुरुआत गर्न सफल भएको छ।
कप्तान सावित्रा भण्डारीको उत्कृष्ट प्रदर्शनले जितमा निर्णायक भूमिका खेल्यो। सावित्राले ह्याट्रिकसहित कुल ४ गोल गर्दै आफ्नो सयौं खेललाई विशेष बनाएकी छिन्। सुरुआती चरणदेखि नै आक्रामक रणनीतिमा उत्रिएको नेपालले पहिलो हाफमै २–० को अग्रता लिएको थियो भने दोस्रो हाफमा थप ७ गोल गर्दै फराकिलो जित सुनिश्चित गर्यो।
खेलको पहिलो गोल अनिता बस्नेतले गर्दै नेपाललाई अग्रता दिलाएकी थिइन्। पहिलो हाफको अन्तिम समयमा सावित्राले हेडमार्फत गोल गर्दै स्कोर २–० बनाइन्।
दोस्रो हाफमा नेपाल अझै आक्रामक बन्यो। सरु लिम्बुले आफ्नो ५०औं क्याप मनाउँदै टिमको तेस्रो गोल गरिन्। त्यसपछि सावित्राले व्यक्तिगत दोस्रो गोल गर्दै स्कोर ४–० पुर्याइन्।
रश्मिकुमारी घिसिङले पाँचौं गोल गर्दै लाओसमाथि दवाब अझ बढाइन्। सावित्राले छैटौं गोल गर्दा स्कोरलाइन ६–० भयो। त्यसपछि पनि नेपाली टोली रोकिने अवस्थामा थिएन। सातौं गोल पनि सावित्राकै नाममा रह्यो, जसले ह्याट्रिक पूरा गरिन्।
अनिता केसीले आठौं गोल गर्दै टिमको दबदबा कायम राखिन्। अन्तिम तथा नवौं गोल सावित्राको प्रहारलाई रोक्ने क्रममा लाओसकी डिफेन्डरबाट आत्मघाती गोल भएको थियो।
नेपालको जितमा सावित्रा भण्डारीको प्रभावशाली प्रदर्शन, मध्यपंक्तिका खेलाडीहरूको बलियो नियन्त्रण र रक्षापंक्तिको सुदृढ संयोजन देखिएको थियो। नेपाली टोलीले पुरै खेलभरि लाओसलाई गोल गर्न एकपल्ट पनि अवसर दिएको थिएन।
यो जितसँगै नेपालले समूह ‘एफ’ मा शीर्ष स्थानमा रहँदै दोस्रो खेलमा आत्मविश्वासका साथ उत्रिने संकेत दिएको छ। प्रशिक्षक र टिम व्यवस्थापनले टिमको समन्वय र फिटनेसलाई सराहना गरेका छन्। अब नेपालको ध्यान आगामी खेलमा निरन्तरता कायम राख्नेमा केन्द्रित हुनेछ।
प्रतिक्रिया !