लोक आवाज ,

जनकपुरधाम, ०६  बैशाख  । जनकपुरस्थित काव्या हस्पिटलले आफ्नो ७ औं वार्षिकोत्सवको अवसरमा सामाजिक उत्तरदायित्व अन्तर्गत दुई महत्वपूर्ण स्वास्थ्य सेवा कार्यक्रम सञ्चालन गर्ने घोषणा गरेको छ। अस्पतालले बैशाख १२ गते रक्तदान कार्यक्रम तथा बैशाख १३ गते थाइराइडसम्बन्धी निःशुल्क स्वास्थ्य शिविर आयोजना गर्न लागेको हो।

काव्या हस्पिटलका सञ्चालक डा. एसके सिंहका अनुसार, यस किसिमका कार्यक्रमले जनकपुर क्षेत्रका सर्वसाधारण नागरिकहरूलाई आवश्यक स्वास्थ्य सेवा प्राप्त गर्न सहयोग पुग्नेछ। “हामीले वार्षिकोत्सवलाई केवल उत्सवको रूपमा मात्र नभई समाजका लागि उपयोगी र सेवा मूलक कार्यका रूपमा मनाउने निर्णय गरेका छौँ,” डा. सिंहले बताए।

अस्पतालले आयोजना गर्ने रक्तदान कार्यक्रमले झन्झटमुक्त र सुरक्षित तरिकाले रगत सङ्कलन गरी आवश्यक परेमा बिरामीहरूलाई सहज रूपमा प्रदान गर्न सहयोग गर्ने विश्वास गरिएको छ। साथै, थाइराइड जाँच शिविरमा विशेषज्ञ चिकित्सकहरूद्वारा निःशुल्क परीक्षण, परामर्श र प्राथमिक उपचार उपलब्ध गराइनेछ।

डा. सिंहका अनुसार, काव्या हस्पिटल जनकपुरमा अत्याधुनिक प्रविधिसहितका विविध विशेषज्ञ सेवा उपलब्ध छन्। अस्पतालमा न्यूरो सर्जरी, ल्याप्रोस्कोपिक सर्जरी, डिएम सुपरस्पेशालिटी सेवा, आईसीयू, एनआईसीयू, इको कार्डियोग्राफी, इन्डोस्कोपी, क्लोनोस्कोपी लगायतका सेवा सञ्चालनमा छन्। हाल अस्पतालमा ३० भन्दा बढी विशेषज्ञ चिकित्सक कार्यरत रहेका छन्, जसले दैनिक सयौँ बिरामीको उपचार गर्दै आएका छन्।

अस्पतालका अधिकारीहरूका अनुसार, रक्तदान र निःशुल्क स्वास्थ्य शिविरजस्ता कार्यक्रमहरूले जनमानसमा स्वास्थ्यप्रतिको चेतना बढाउने र समयमै रोग पहिचान तथा उपचारतर्फ अग्रसर गराउने उद्देश्य राखिएको छ। यस्ता कार्यहरूले समुदायमा अस्पतालप्रतिको विश्वास बलियो बनाउने र सर्वसाधारणमा स्वास्थ्य सेवामा पहुँचको महसुस गराउने अपेक्षा गरिएको छ।

काव्या हस्पिटलले आगामी दिनहरूमा पनि विभिन्न रोगहरू सम्बन्धी निःशुल्क शिविर तथा जनचेतनामूलक कार्यक्रमहरू सञ्चालन गर्ने योजना बनाएको जनाएको छ। अस्पतालले जनकपुरमा गुणस्तरीय र विश्वसनीय स्वास्थ्य सेवा उपलब्ध गराउने आफ्नो दायित्वलाई निरन्तरता दिने प्रतिबद्धता जनाएको छ।