जनकपुरधाम, २४ माघ –  मधेश प्रदेशका मुख्यमन्त्री सतिशकुमार सिंहले मिथिलाको साहित्य, संगीत, र संस्कृतिको संरक्षण र प्रवद्र्धनमा जनकपुर साहित्य महोत्सवको महत्वपूर्ण भूमिका रहेको बताएका छन्। उनले महोत्सवको छैटौँ संस्करणलाई साहित्यिक, सांस्कृतिक, र सामाजिक चेतना फैलाउन महत्त्वपूर्ण अवसर मान्दै यसले वर्तमान युगको चुनौतीपूर्ण परिवेशमा साहित्य र कलालाई जोगाउन योगदान पुर्याउने विश्वास व्यक्त गरे।

मुख्यमन्त्री सिंहले साहित्य र कला जोगाउन अहिलेको भाइरल युगको विशेष चुनौतीको रूपमा अघि आएको कुरामा टिप्पणी गर्दै, “ट्विटर र टिकटकको युगमा साहित्य र संस्कृति जोगाउन निकै कठिन छ,” भने। उनले उडिसाका कवि हल्दर नागको उदाहरण दिँदै भने, “नागले कक्षा ३ सम्म अध्ययन गरे पनि उनका कविताबाट ५ विद्यार्थीले पीएचडी गरेका छन्, जसले देखाउँछ कि सिर्जनशीलताको मुल्याङ्कन शैक्षिक प्रमाणपत्रमा मात्र निर्भर छैन।”

यस्तै, सिंहले जनकपुर साहित्य महोत्सवजस्ता सांस्कृतिक गतिविधिहरूको महत्व राज्यको अपूरो भूमिकाको कारण उल्लेख गरे। उनले रामायणकालको प्रसंगमा संस्कृति र सभ्यताको संरक्षणको आवश्यकता औंल्याउँदै भने, “रामलाई राम बनाउन सीताको ठूलो भूमिका थियो, जसले नारीको महत्वपूर्ण स्थानलाई स्पष्ट पार्दछ।”

यसका साथै, उनले नेपालका जंगलहरूको दयनीय अवस्थाबारे चिन्ता व्यक्त गर्दै पर्यावरण संरक्षणको आवश्यकता जोड दिए।