लोक आवाज ,जनकपुरधाम, १५ माघ – जनकपुरधामको ऐतिहासिक सिया रघुनाथ सदन मन्दिरको जग्गामा भइरहेको अवैध निर्माणलाई जनकपुरधाम उपमहानगरपालिकाले तुरुन्त रोक लगाएको छ। बिना नक्सापास र कुनै कानुनी प्रक्रिया पूरा नगरी भइरहेको यो निर्माणलाई गुठीको जग्गामा गैरकानूनी ढंगले भइरहेको भन्दै उपमहानगरपालिकाले आवश्यक कारबाही अघि बढाएको हो।

उपमहानगरपालिकाको नगर प्रहरीको टोलीले मन्दिरको जग्गामा भइरहेको यो गैरकानूनी निर्माण स्थलमा पुगेर काम रोक्न निर्देशन दिएको मात्र होइन, त्यहाँ प्रयोग भइरहेको निर्माण सामग्रीसमेत जफत गरेको छ। मन्दिरको जग्गामा भूमाफियाहरूले अवैध रूपमा निजी घरहरू निर्माण गरिरहेका थिए, जसलाई उपमहानगरपालिकाले तुरुन्त हस्तक्षेप गरी रोकेको हो।

जनकपुरधामको बिहारकुण्डस्थित सिया रघुनाथ सदनको जग्गा धार्मिक र ऐतिहासिक दृष्टिले महत्वपूर्ण मानिन्छ। भूमाफियाहरूले यस क्षेत्रमा गैरकानूनी ढंगले निर्माणकार्य गरिरहेको थाहा पाएपछि जनकपुरधाम उपमहानगरपालिकाले यो कदम चालेको हो। विशेषतः, मन्दिरको गुठी जग्गामा बिना कुनै कानुनी अनुमति र बिना उपमहानगरपालिकाको इजाजतका घरहरू निर्माण गरिँदै थियो।

धमाधम भइरहेको यो अवैध निर्माणको कारण जनकपुरधाम उपमहानगरपालिकालाई ठूलो चुनौतीको सामना गर्नुपरिरहेको थियो। लगभग १९ करोड रुपैयाँ भन्दा बढी मूल्य रहेको यो जग्गामा भूमाफियाहरूले कानुनी प्रक्रियाको उल्लंघन गर्दै भवनहरू निर्माण गर्दै आएका थिए। यो प्रक्रिया बिना कुनै सरकारी अनुमतिपत्र र उपमहानगरपालिकाको इजाजतले भइरहेकाले, भूमाफियाहरूले अवैध रूपमा घर बनाउनेहरूबाट प्रतिधुर लाखौं रुपैयाँ असुल गर्दै आएका थिए।

उपमहानगरपालिकाले यो अवैध निर्माण रोकेपछि स्थानियवासीहरूले राहतको सास फेरेका छन्। मन्दिर क्षेत्रको संरक्षणका लागि यो कदम महत्वपूर्ण भएको स्थानीयहरूले बताएका छन्। उपमहानगरपालिकाले यस घटनालाई गम्भीरतापूर्वक लिएको र भविष्यमा पनि यस्ता अवैध क्रियाकलापमा कडा कदम चाल्ने प्रतिबद्धता जनाएको छ।

साथै, जनकपुरधाम उपमहानगरपालिकाले अवैध निर्माण रोक्नका लागि अझ कडा निगरानी गर्ने योजना अघि सारेको छ। यससँगै मन्दिरको जग्गा सुरक्षित राख्नका लागि थप सुरक्षा मापदण्ड लागू गर्ने र गुठीका अन्य सम्पत्तिहरूको पनि संरक्षणका लागि तत्काल कदम चालिने जानकारी दिएको छ।