जनकपुरधाम, ८ माघ – नव मिथिला फाउण्डेशनले माघ २४ गतेदेखि आयोजना गर्न लागेको छैटौं जनकपुर साहित्य महोत्सवको तयारी तीव्र गतिमा अघि बढिरहेको छ। महोत्सव अन्तर्गत विद्यालयस्तरीय कविता, वक्तृत्वकला, कथा वाचन र अन्तरविद्यालय चित्रकला प्रतियोगिताको आयोजना गरिएको छ।

मंगलबार आयोजित कविता र कथा वाचन प्रतियोगिताको अडिशन राउण्डबाट टप टेन विद्यार्थीहरू छनोट भएका छन्। कविता प्रतियोगितामा अस्मिता रानी ठाकुर, प्रभाकर झा, अतिथि प्रिया, सुमित झा, नेहा सिंह, र मनिका सिंह उत्कृष्ट ठहरिएका छन् भने कथा वाचनमा भमिका साह, ओम लाभ, साक्षी झा, अन्जन कुमार, र प्रिती पाण्डे छनोट भएका छन्।

यसअघि, वक्तृत्वकला प्रतियोगिताको अडिशनबाट सत्यम झा, सिद्धि ठाकुर, राजनन्दनी यादव, अंशुका पाण्डेय, र रितिका यादव छनोट भएका थिए।

फाउण्डेशनका अध्यक्ष अमित साहका अनुसार, प्रतियोगिताबाट विभिन्न विधामा उत्कृष्ट ठहरिएका विद्यार्थीहरूले महोत्सवमा सहभागिता जनाउने छन्। प्रथम, दोस्रो र तेस्रो स्थान हासिल गर्ने विद्यार्थीहरूलाई क्रमशः २१ हजार, ११ हजार, र ५ हजार १ सय रुपैयाँ नगद पुरस्कार प्रदान गरिनेछ।

नव मिथिला फाउण्डेशनले यो महोत्सव विगत पाँच वर्षदेखि सफलता पूर्वक आयोजना गर्दै आइरहेको छ।